Dowladda Soomaaliya ayaa si rasmi ah u codsatay inay ku biirto 36-da dal ee Afrikaanka ah, iyagoo ka faa’iideysanaya sharciga kobaca iyo fursadaha Afrika ee AGOA.
Codsigan ayay dowladda Soomaaliya uga dhawaaqday intii lagu guda jiray xafladda codsiga AGOA ee Soomaaliya, iyadoo safiirka Mareykanka ee Soomaaliya, Larry André oo xilka ka degaya uu muujiyay sida ay Mareykanka uga go’an tahay ballaarinta iyo casriyeynta iskaashiga Afrika iyo Soomaaliya.
Danjire André ayaa carrabka ku adkeeyay in Mareykanka uu diiradda saari doono la shaqeynta Soomaaliya iyo dadkeeda si loo helo xalal cusub oo lagu xalliyo caqabadaha cusub iyo kuwa muddada dheer soo jiray, lagana faa’ideysto cilmi-baarista iyo teknoolojiyadda cusub, iyo in la maalgashado ilo xooggan oo mustaqbalka fog ah iyadoo wax laga qabanayo baahiyaha degdegga ah.
Tan iyo markii uu ansixiyay Congress-ka Mareykanka 2000, AGOA waxay udub dhexaad u ahayd siyaasadda dhaqaalaha Mareykanka iyo la macaamilka ganacsi ee Afrika. Sida uu sheegay danjire André, AGOA waxa ay u sahli doontaa Soomaaliya in ay wax soo saarkeeda u dhoofiso suuqyada Mareykanka iyadoo ay aad u yaraadeen caqabadaha ganacsiga.
Si kastaba ha ahaatee, si ay u buuxiso shuruudaha adag ee u-qalmitaanka AGOA, Soomaaliya waa in ay horumar dheeraad ah ka samaysaa samaynta dhaqaale ku salaysan suuqa, ku dhaqanka sharciga, siyaasadda kala duwanaanshaha, iyo xaqa nidaamka cadaaladeed. Intaa waxaa dheer, Soomaaliya waxaa laga filayaa inay dejiso siyaasado lagu dhimayo faqriga, lagula dagaallamayo musuqmaasuqa, laguna ilaaliyo xuquuqda aadanaha.
Danjire André ayaa yiri, “Siyaasadahani waxay abuuri doonaan jawi xasiloon oo la saadaalin karo ganacsiyada si ay ugu shaqeeyaan waxayna gacan ka geystaan hubinta in kheyraadka loo isticmaalo si hufan. Waxaas oo dhan iyadoo maskaxda lagu hayo, safaaraddu waxay sharaf u tahay inay bixiso xiriirka u dhexeeya dowladda federaalka Soomaaliya iyo wakiilka ganacsiga ee Mareykanka.”
