Kuuriyada Koonfureed: Pyongyang ayaa gantaal aan la garanayn u ridday dhanka badda

0
49

Milateriga Kuuriyada Koonfureed ayaa maanta oo Arbaco ah sheegay in Kuuriyada Waqooyi ay “madfac aan la cayimin” ku soo ridday badda xeebteeda bari, toddobaad ka dib markii Pyongyang ay ballan-qaadday inay sida ugu dhaqsaha badan u horumarinayso ciidamadeeda Nukliyeerka.

Gantaalkan ayaa ah kii 14-aad ee ay tijaabiso Kuuriyada Waqooyi tan iyo bilowgii sanadkan,waxana ay ku soo beegantay maalmo ka hor inta uusan xilka la wareegin madaxweynaha la doortay ee Kuuriyada Koonfureed Yoon Seok-yeol  kaas oo 10-ka bishan May xilka la wareegayo.

Faahfaahinta ku saabsan gantaalka, oo ay ku jiraan baaxadiisa iyo jooggiisaba, ma cadda weli.

Dhankooda, Ilaalada Xeebaha Japan ayaa sheegay in Pyongyang ay ridday wax laga yaabo in uu yahay gantaal ballistic ah, kaas oo si dhab ah ugu dhacay badda.

Toddobaadkii hore, hoggaamiyaha Kuuriyada Waqooyi Kim Jong Un ayaa ballan qaaday inuu dardargelin doono horumarinta hubka niyuukleerka ee dalkiisa, isagoo kormeeray dhoola-tus milateri oo ballaaran.

Hoggaamiyaha Kuuriyada Waqooyi ayaa sheegay in laga yaabo in uu adeegsado hubka Nukliyeerka ah haddii “danta muhiimka ah” ee dalkiisa la halis galiyo.

Abriil 2018, Kuuriyada Waqooyi waxay ku dhawaaqday inay joojisay tijaabinta gantaallada ballistic-ga ee Nukliyeerka iyo kuwa isaga gudba qaaradaha, waxayna u hoggaansantay ballanqaadkeedii tan iyo markaas.

Pyongyang waxa ay bedeshay istiraatijiyaddeeda bishii Janaayo ee sannadkii hore, markii, shirweynaha xisbiga, uu dejisay qorshayaal lagu horumarinayo hubka nukliyeerka ah, soo saarista madaxyo nukliyeer ah oo aad u weyn, hagaajinta saaxada ah ee 15,000 km, helitaanka badda hoosteeda ee tamarta nukliyeerka ah, iyo ka shaqeynta dayax gacmeedyada iyo sahamintooda.

Hoggaamiyaha Kuuriyada Waqooyi Kim Jong Un ayaa khudbad uu jeediyay xilli uu ka qeyb galayay dhoola-tus milateri oo ka dhacay magaalada Pyongyang, waxa uu ballan qaaday in uu ka shaqeyn doono sidii loo “xoojin lahaa loona horumarin lahaa” hubka nukliyeerka ee dalkiisa, sida ay sheegtay warbaahinta rasmiga ah ee dalkaasi.

“Waxaan ku sii wadi doonnaa xawaaraha ugu dhaqsaha badan si aan u qaadno tillaabooyin lagu wanaajinayo laguna horumarinayo awoodaha nukliyeerka ee dalkeena,” Kim ayaa yiri, sida lagu sheegay warbixin ay daabacday wakaaladda wararka dhexe ee rasmiga ah ee dalkaasi.

Wakaaladdu waxay xustay in madaxweynaha uu khudbadiisa jeediyay galinkii dambe ee Isniintii intii lagu guda jiray dhoola-tus militari oo lagu xusayay 90-guuradii kasoo wareegtay aasaaskii ciidanka Kacaanka shacabka Kuuriya oo lagu qabtay fagaaraha Kim Il Sung ee caasimadda Pyongyang.

Yaboohan ayaa imaanaya iyadoo Pyongyang ay sare u qaadayso tijaabinta hubka iyo muujinta awooda militari, iyadoo uu istaagay wadahadalada Nukliyeerka ee ay kula jirtay Mareykanka, iyo imaanshaha maamulka muxaafidka ah ee Kuuriyada Koonfureed.

Kuuriyada Waqooyi ayaa waxaa saaran cunaqabateyn adag oo Mareykanka iyo Qaramada Midoobay ay ku soo rogtay barnaamijkeeda hubka Nukliyeerka ah, waxaana wadahadallo dublamaasiyadeed oo uu Kim la yeeshay aan weli lagu qancin inuu joojiyo barnaamijkiisa Nukliyeerka, waxaana la hakiyay tan iyo markii uu fashilmay kulan dhex maray isaga iyo madaxweynihii Mareykanka Donald Trump sanadka 2019.

Saraakiisha Mareykanka iyo Kuuriyada Koonfureed iyo falanqeeyayaasha ayaa rumeysan in laga yaabo in Pyongyang ay dhawaan dib u bilowdo tijaabinta hubka Nukliyeerka, oo la joojiyay sanadkii 2017-kii.

Saraakiisha Maraykanka iyo Kuuriyada Koonfureed ayaa sheegay in ay jiraan calaamado muujinaya dhismo cusub oo laga dhisayo goobta kaliya ee Kuuriyada Waqooyi ay ku tijaabineyso Nukliyeerka, kaas oo si rasmi ah u xirnaa tan iyo 2018, taasoo muujineysa in laga yaabo in Pyongyang ay isku diyaarineyso inay dib u bilowdo tijaabinta hubka Nukliyeerka.

Isagoo guddoominaya dhoola-tus militari Isniintii, Kim wuxuu sheegay in hubka nukliyeerka ee waddanku uu yahay “astaanta xoogga qaranka” loona baahan yahay in la kala saaro.

“Si loogu diyaargaroobo xaaladaha siyaasadeed iyo kuwa milatariga ee qallafsan iyo dhammaan noocyada dhibaatooyinka mustaqbalka waxaan u xoojin doonnaa sida ugu dhaqsaha badan awoodeena nukliyeerka,” ayuu raaciyay hadalkiisa.

Hogaamiyaha Kuuriyada Waqooyi ayaa sheegay in inkasta oo doorka koowaad ee hubka Nukliyeerka ee dalkiisa uu yahay ka hortag, haddana ay tahay jawaab celin haddii la weeraro “danta muhiimka ah” ee Kuuriyada Waqooyi

 Marqaati. com

LEAVE A REPLY